இந்திய அணி நான்காவது டெஸ்டில் தோற்றாலும், இந்திய அணியால் பைனலுக்கு முன்னேற முடியும் என்ற நிலை ஏற்பட்டுள்ளது.
இந்திய அணி நான்காவது டெஸ்டில் தோற்றாலும், இந்திய அணியால் பைனலுக்கு முன்னேற முடியும் என்ற நிலை ஏற்பட்டுள்ளது.
இந்தியா, ஆஸ்திரேலியா இடையிலான நான்காவது டெஸ்ட் போட்டி தற்போது அகமதாபாத்தில் துவங்கி நடைபெற்று வருகிறது.
இதில் டாஸ் வென்ற ஆஸ்திரேலிய அணி முதலில் களமிறங்கி சிறப்பாக பேட்டிங் செய்தது.
ஆஸ்திரேலிய இன்னிங்ஸ்:
முதலில் களமிறங்கிய ஆஸ்திரேலிய அணியில் ஓபனர் டிராவிஸ் ஹெட் 32 (44), ஸ்டீவ் ஸ்மித் 38 (135) ஆகியோர் ஓரளவுக்கு ரன்களை சேர்த்தார்கள். இதனைத் தொடர்ந்து உஸ்மான் கவாஜா 180 (422), கேமரூன் கிரீன் 114 (170) ஆகியோர் பெரிய பார்ட்னர்ஷிப் அமைத்து ரன்களை குவித்து அசத்தினார்கள். தொடர்ந்து, கடைசிக் கட்டத்தில் நாதன் லைன் 34 (96), டோட் மர்பி 41 (61) ஆகியோர் எதிர்பார்க்காத நேரத்தில் ரன்களை குவித்ததால், ஆஸ்திரேலிய அணி முதல் இன்னிங்ஸில் 480/10 ரன்களை சேர்த்தது.
இந்திய இன்னிங்ஸ்:
இதனைத் தொடர்ந்து முதல் இன்னிங்ஸ் களமிறங்கிய இந்திய அணியில் ரோஹித் ஷர்மா 35 (58), ஷுப்மன் கில் 128 (235), புஜாரா 59 (128) ஆகியோர் சிறப்பாக விளையாடி, ஆஸ்திரேலிய அணிக்கு நெருக்கடியை ஏற்படுத்தினர். தொடர்ந்து விராட் கோலி சிறப்பாக விளையாடி 14 மாதங்களுக்குப் பிறகு அரை சதத்தை பூர்த்தி செய்தார்.
இதனைத் தொடர்ந்து இரட்டை சதம் அடிக்கும் முனைப்பில் விளையாடி வந்த கோலி, 186 (364) ரன்களை எடுத்து ஆட்டமிழந்தார். ஸ்ரீகர் பரத் 44 (88), அக்சர் படேல் 79 (113) ஆகியோரும் தங்களது பங்கிற்கு ரன்களை சேர்த்திருந்ததால், இந்திய அணி 571/10 ரன்களை குவித்து, ஆஸ்திரேலியாவைவிட 91 ரன்கள் முன்னிலை பெற்றது.
கடைசி நாள் ஆட்டம்:
தற்போது ஆஸ்திரேலிய அணி 3/0 ரன்களை எடுத்து, 88 ரன்கள் பின்தங்கிய நிலையில் களத்தில் இருக்கிறது. பிட்ச் தொடர்ந்து பேட்டர்களுக்கு சாதகமாக இருப்பதால், அதிகபட்சமாக ஆஸ்திரேலிய அணி இரண்டாவது செஷன் முடிவுவரை பேட்டிங் செய்து, கடைசி செஷனில் இந்திய அணிக்கு 150 ரன்களை இலக்காக நிர்ணயிக்க வாய்ப்புள்ளது. அப்படி இருந்தாலும், ஆட்டம் டிராதான் ஆகும்.
டெஸ்ட் சாம்பியன்ஷிப் பைனல்:
இப்போட்டி டிரா ஆனால், இந்திய அணியால் நேரடியாக உலக டெஸ்ட் சாம்பியன்ஷிப் பைனலுக்கு முன்னேற முடியாது. நியூசிலாந்துக்கு எதிரான 2 டெஸ்ட் போட்டிகளில் இலங்கை ஒரு போட்டியில் டிரா அல்லது தோல்வியை சந்தித்தால்தான், இந்திய அணியால் பைனலுக்கு முன்னேற முடியும். அதற்கு வாய்ப்பு பிரகாசமாக இருக்கிறது.
தற்போது நியூசிலாந்து, இலங்கை இடையில் முதல் டெஸ்ட் நடைபெற்று வருகிறது.
இதில், 285 ரன்கள் இலக்கை துரத்திக் களமிறங்கியுள்ள நியூசிலாந்து அணி, 28/1 என்ற நிலையில் இருக்கும்போது, மழை குறுக்கிட்டுள்ளது. கடைசி இரண்டு செஷன்கள் மட்டுமே இருக்கிறது. இன்னமும் மழை நிற்கவில்லை. இதனால், ஆட்டம் டிரா ஆக அதிக வாய்ப்புகள் இருக்கிறது. அப்படி நடந்தால், இந்திய அணி பைனலுக்கு முன்னேறிவிடும் என்பது குறிப்பிடத்தக்கது.